Page 19 - Уран зохиол

ХИЧЭЭЛ, СУРГАЛТЫН ҮР ДҮНГ ҮНЭЛЭХ ШАЛГУУРЫГ ХЭРЭГЛЭХ ЗӨВЛӨМЖ

Зохиолын үйл явдлын уялдаа холбоог түлхүүр үг, бүдүүвчээр харуулдаг. Зохиолд үйл явдал нь
нийгэм, соёлын хам сэдэвтэй хэрхэн холбогдож байгааг мэдэрч, тусган хүлээж авснаа
илэрхийлдэг.
Энэ түвшинд задлан шинжлэх, нэгтгэн дүгнэх чадварыг зохиолын уялдаа холбоог нийгэм, соёлын
хам сэдэвтэй уялдуулж хөгжүүлнэ. Сурагчдын ихэнхийг энэ түвшинд хүргэвэл таны шавь оюун тэлж,
өсөж байна, сургалт ч үр дүнтэй байгаагийн илрэл юм. Хүүхэд бүр адилгүй тул ахиц дэвшилтэй
сурагч бүрийг мөн энэ түвшинд байлгах шаардлагагүй.
Зохиолын сэдэв, гол санаа нь нийгэм, соёлын хам сэдэвтэй яаж холбогдож байгааг ойлгож, юуг
мэдэрч, тусган хүлээж авснаа илэрхийлдэг.
Өмнөх түвшнээсээ ялгаатай нь /өмнөх зохиолын уялдаа холбоог хам сэдэвтэй холбож байсан бол/
зохиолын сэдэв, гол санаа нь нийгэм, соёлын хам сэдэвтэй яаж холбогдож байгааг буюу үнэлж
бүтээж байгаагаар ялгарч байгаа юм. Сурагчдын ихэнх нь энэ түвшинд хүрвэл уран зохиолын хичээл
маань жинхэнэ утгаараа зорилгоо биелүүлж буй юм.
Тэгвэл хичээлийн явцад багш сайн ажиглагч, тэмдэглэгч байх. Хичээл заах явцад хэн нь илүү
сайн хөгжөөд байгааг дэвтэрт нь, эсвэл хувийн журналдаа тэмдэглээд байх хэрэгтэй. Хүүхэд
бүр ижил байдаггүйг бид ойлгож байгаа. Тэгвэл түрүүлж хийчхээд байгаа сурагчийг яах вэ?, бүр
таг чиг суугаад байгааг яаж хөгжүүлэх үү?, ихэнх нь аль түвшинд байна вэ? гэдэгт үнэлгээний
шалгуур туслах юм.
Зарим сурагчид ярих, санаагаа хэлэх байтугай асуултад хариулахаас ч айдаг. Энэ байдал сурах
үйл ажиллагаанд саад болдог. Гэрийн хүмүүжил, эсвэл доог тохуу хийх, шүүмжлүүлэх, буруудахаас
айх зэрэг нь аман үнэлгээний нөлөөг хязгаарладаг. Харин багш энэ байдлыг судлах хэрэгтэй.
Зарим сурагчид огт ярьж хэлж чадахгүй мөртөө бичгийн ажлыг дориун гүйцэтгэдэг шүү дээ. Тийм
учраас асуулт даалгаврын хариуг бичүүлж ахиц амжилтыг тооцох хэрэгтэй. Өөрөөр хэлбэл аман
бичгийн хэлбэрийг хослуулна.
Жич: Уран зохиолын хичээлийн үнэлгээний шалгуурыг нэгж хичээлдээ төлөвлөж ажиллах
талаар бүрэн дунд боловсролын зөвлөмжөөс харна уу. Түүнд судлах зохиолын төрөл зүйл,
агуулга, хэмжээнээс хамаарч ямар үр дүнд хэдийд хүрэхээ график төлөвлөгөө гарган
ажиллахыг хүснэгтээр харуулсан байгаа.

Явцын үнэлгээнд үнэлгээний шалгуурыг хэрэглэх
Хичээл сургалтын үйл ажиллагаандаа өдөр тутам явцын үнэлгээг хэрэглэдгийн учир нь сурагчдынхаа
давуу болон сул талыг тодорхойлж, сурагчдыг ахиц дэвшил гаргах, сурах арга барил суулгах,
сэтгэх чадварыг тэлэх, өөрийн удирдлагатай суралцахад нь дэмжлэг үзүүлэх зэрэг давуу талуудтай.
Явцын үнэлгээ нь сурах үйл ажиллагаанд дараах байдлаар дэмжлэг үзүүлдэг.
• Сурагчидтай суралцахуйн зорилгын талаар ярилцах
• Тэд юу мэдэж, чадаж байгааг ойлгох
• Чанартай гүйцэтгэл ямар байдаг, түүнд хүрэхийн төлөө яаж ажиллах, ямар арга зам байгааг
ойлгоход туслах
• Өөрийн болон анги хамт олны үнэлгээг дэмжих
• Сурагчдын цаашид хийх алхмуудыг нарийвчлан чиглүүлсэн зөвлөмж /фийдбак/-ийг өгөх.
Явцын үнэлгээг өдөр бүр хичээл сургалтдаа хэрэгжүүлэх олон арга байдаг.
• Суралцагчдаас хүлээж буй үр дүнгүүдийг тэдэнд мэдээлэх
• Гол чухал ажлыг ялган танихад нь туслах
• Өөрийн ажлын сайжруулах шаардлагатай талуудыг тодорхойлоход туслах
• Хичээлийн турш ахиц дэвшлийг хянах
• Сурагчийн буруу ойлголтыг тодорхойлох
• Сурагчдад хоцрогдож байгаа зүйлээ тодорхойлоход нь туслах
• Амжилтыг урамшуулан сайшаах.
Явцын үнэлгээ бол анги танхимын үйл ажиллагааны нэг чухал бүрэлдэхүүн хэсэг бөгөөд тасралтгүй
хэрэгжүүлснээр сурагчийг чадавхыг нэмж, ахиц дэвшилд хөтөлж байдаг билээ.

15