Page 27 - Mat_baga -1217

ХИЧЭЭЛ, СУРГАЛТЫН ҮР ДҮНГ ҮНЭЛЭХ ШАЛГУУРЫГ ХЭРЭГЛЭХ ЗӨВЛӨМЖ

ДӨРӨВ. АНХААРАХ ЗҮЙЛС

4.1. Үр дүнгийн үнэлгээ хийхэд анхаарах зүйлс

Багш бүлэг сэдэв, улирал, хичээлийн жилийн эцэст үр дүнгийн үнэлгээг хийнэ. Математикийн бүлэг
сэдэв эсвэл үнэлгээний нэгж бүрийн суралцахуйн үр дүнг үнэлэх шалгуурыг үндэслэн үнэлгээний
төлөвлөгөө гарган, блюпринтийн дагуу боловсруулсан сорил, даалгавар, бие даан ажиллах ажлын
хуудас, бүтээлийг үнэлж, дүгнэж, энэхүү гарч буй үр дүн, гүйцэтгэлийн түвшин нь тухайн сурагчийн
эзэмшсэн мэдлэг, чадварын түвшнийг илтгэнэ.
Үр дүнгийн үнэлгээг ганцаарчилсан буюу багаар зохион байгуулж, зөвхөн бичгийн шалгалтад
баригдалгүй өгөгдөл мэдээлэлтэй ажиллах, өөрийгөө илэрхийлэх, бие даах болон хамтран ажиллах
зэргээр мэдлэг, чадвараа янз бүрийн хэлбэрээр үнэлж дүгнүүлэх боломж олгон, шалгалтаас айх айдсыг
багасгах боломжтой. Үнэлгээ хийх хугацаа, арга, хэлбэрээс үл хамаарч үр дүнгийн үнэлгээний гүйцэтгэл
нь сурагчийн эзэмшсэн мэдлэг, чадварын түвшнийг илэрхийлэх бөгөөд сурагч тухайн түвшний
шалгуурыг хангаж байна гэсэн үг юм. Үнэлгээний шалгуур, даалгаврыг 8 түвшин бүрт харгалзуулан
боловсруулах шаардлагагүй юм.
Үр дүнгийн үнэлгээнд анхаарах зүйлс:
• Үнэлгээний дүгнэх аргачлалыг тодорхой боловсруулж сурагчдад танилцуулах
• Үнэлгээний шалгуурыг илрүүлэхүйц үнэлгээний даалгавар боловсруулах (Үнэлгээний жишиг
даалгавар, бүтээлийн жагсаалт, ажлын хуудас гэх мэт)
• Бүлэг сэдэв, хагас жил болон жилийн эцсийн үнэлгээг энэ хугацаанд судалсан агуулгыг бүрэн
хамруулна.
• I-II ангид үр дүнгийн үнэлгээ хийхгүй, сурагчийн хувийн хэрэгт тодорхойлолт бичдэг.
Үр дүнгийн үнэлгээг хийхдээ сургууль, заах аргын нэгдэл, секцээрээ хэлэлцэж, үнэлгээний шалгуурт
үндэслэн үнэлгээний төлөвлөгөө буюу блюпринт боловсруулна.
Блюпринт нь үнэлгээ хийх нарийвчилсан төлөвлөгөө бөгөөд тест, даалгаврын оноо болон хэлбэрээс
үл хамааран тогтвортой байх нөхцөлийг бүрдүүлж, ач холбогдолтой. Тухайн нэгж хичээлийн хувьд
сургалтын нийт цагаар үзсэн бүх агуулгыг нэг бүрчлэн шалгах боломжгүй учраас даалгаврын
блюпринт боловсруулна. Блюпринт боловсруулахын тулд бид сургалтын хөтөлбөр дэх үнэлгээний
зорилт, түүнд харгалзах шалгуурт баримжаалан мэдлэг, ойлголт, чадвар, хэрэглээ гэсэн 3 зорилтын
хүрээнд даалгаврыг боловсруулах, түүнд харгалзах мэдлэг, чадварын шалгуурт баримжаалдаг.
Үнэлгээний даалгаврын блюпринт боловсруулахад анхаарах зүйлс:
• Даалгаврын агуулгыг тодорхойлж, агуулга тус бүрийн эзлэх хувь болон, даалгаврын тоог тогтоох
(тоо тоолол 40%, хэмжигдэхүүн 20%, геометр 20%, өгөгдөлтэй ажиллах 20% гэх мэт) Энд тухайн
агуулга ангийн судлах агуулгын хэдэн хувийг эзэлдэг, хэдэн цаг ордог болохыг тооцон даалгаврын
тоог тодорхойлох нь үнэлгээг бодитой болгоход чиглэх юм.
• Даалгавар нь танин мэдэхүйн ямар түвшинд хамрагдахыг тодорхойлж, үнэлгээний шалгуур тус
бүрийн эзлэх хувийг баримжаалан, даалгаврын тоог тогтоох (мэдэх ойлгох 40%, холбон хэрэглэх
40%, задлан шинжлэх 20% гэх мэт)
• Энэ нь даалгавар нормаль тархалттай эсэхийг хянах ач холбогдолтой.
• Даалгаврын тавилыг анхаарч, сонгох болон задгай даалгаврын хэлбэрийн зохистой харьцааг
тооцохоос гадна нээлттэй төрлийн даалгавар төлөвлөх боломжтой.
• Асуудал шийдвэрлэх даалгаврыг зөвхөн өгүүлбэртэй бодлогоор төсөөлөхгүйгээр математикийн
мэдлэг, чадвар шаардсан асуудлыг шийдвэрлэхээр төлөвлөнө.
• Багш мэдлэг, ойлголтыг үнэлэхдээ мэдлэгийн төрлүүдийг анхааран тооцно. Үүнд:
а. Баримтын мэдлэг
b. Ухагдахууны мэдлэг
с. Үйлийн мэдлэг
d. Метакогнитив мэдлэг

23