Page 14 - Mat_baga -1217

ХИЧЭЭЛ, СУРГАЛТЫН ҮР ДҮНГ ҮНЭЛЭХ ШАЛГУУРЫГ ХЭРЭГЛЭХ ЗӨВЛӨМЖ

1.3. Үнэлгээний шалгуурыг жил, нэгж, ээлжит хичээлд хэрэглэх

Суралцахуйн үр дүн, үнэлгээний шалгуурыг ээлжит, нэгж хичээлд хэрхэн хэрэглэх, явцын болон үр
дүнгийн үнэлгээ, оношлох үнэлгээнд хэрэглэх арга зүйн талаар маш товчхон авч үзье.
Оношлох үнэлгээнд хэрэглэх
Тухайн хичээлийн жилийн эхэнд эсвэл улирлын эхэнд сурагчдын өмнөх мэдлэг ямар түвшинд
байгааг үнэлгээний шалгуураар тогтоож, оношлох боломжтой. Оношлох үнэлгээг хийхдээ өмнөх
ангид эсвэл өмнөх улиралд зайлшгүй эзэмшсэн байх агуулгад суурилан тухайн суралцахуйн үр дүнд
хүрсэн эсэхийг тогтооно. Өөрөөр хэлбэл, тухайн ангийн сурагчдын мэдлэг, чадвар ямар түвшинд
байгааг хичээл зааж байгаа багш өөрөө төлөвлөн зохион байгуулж, сурагч нэг бүрийн түвшнийг
оношлон тогтоож, энэхүү оношлогоо судалгаандаа үндэслэн цаашдын сургалт болоод багшлахуйн
үйл ажиллагааг удирдан, төлөвлөж зохион байгуулах нь чухал.

Үр дүнгийн үнэлгээнд хэрэглэх
Бага боловсролын түвшинд I-V анги тус бүрд 4-8 үнэлгээний нэгжийг төлөвлөсөн тул үнэлгээний
нэгж тус бүрийн суралцахуйн үр дүнг үнэлэх зорилгоор үнэлгээний шалгуурын дагуу даалгавар
боловсруулж, үр дүнгийн үнэлгээг хийх боломжтой. Энэ нь тухайн үнэлгээний нэгж агуулгын хүрээнд
тодорхойлсон суралцахуйн үр дүн, үнэлгээний шалгуур, гүйцэтгэлийн түвшинд тохирсон даалгавар
боловсруулж, сурагчдын хүрсэн үр дүнг үнэлж, амжилтыг баримтжуулан бүртгэхээс гадна сурагчдын
суралцахуйд дэмжлэг үзүүлэх процесс юм. БСШУСЯ-ны сайдын 2018 оны 6 дугаар сарын 29-ний
өдрийн А/425 дугаар тушаалын хавсралтад зааснаар үр дүнгийн үнэлгээ нь сурлагын амжилтын
үр дүнг хэмжих зорилготой ба үр дүнгийн үнэлгээнд бүлэг сэдвийн төгсгөл, улирлын төгсгөл
болон анги дэвших шалгалт, улсын шалгалтыг багтаан авч үзсэн байдаг.
Багш нэгж сэдвийн хүрээнд тодорхойлсон суралцахуйн үр дүн болох 3 хэмжээсийг (математикийн
агуулга*математик чадвар*танин мэдэхүй) хэмжихүйц даалгавруудыг сонгон авч, боловсруулалт
хийн шалгалтыг зохион байгуулах ба шалгалтын үр дүнд шинжилгээ хийн баримтжуулах, сурагчдад
мэдээлэх, сургалтын арга хэлбэр, зохион байгуулалтаа сайжрууулахад ашиглана.

Жилийн эцсийн үнэлгээнд хэрэглэх
Сурагчдын жилийн үнэлгээг хийхдээ үнэлгээний нэгжийн суралцахуйн үр дүнгийн үнэлгээнүүдийг
нэгтгэн, сурагч нэг бүрээр тохирох гүйцэтгэлийн дунджийг гаргах боломжтой. Мөн хичээлийн
жилийн эцэст тухайн ангийн үнэлгээний шалгууруудад нийцсэн үнэлгээний даалгавар боловсруулж,
үр дүнгийн үнэлгээ хийнэ. Энд заавал бүх үнэлгээний шалгуурыг оруулах шаардлагагүй бөгөөд
сургууль, нэгдэл секцийн багш нар хэлэлцэж, төлөвлөсний дагуу тухайн ангид шинээр судалсан
болон зайлшгүй үнэлэх шаардлагатай суралцахуйн үр дүнг зохих үнэлгээний шалгууруудаар үнэлнэ.
Матеаматикийн сургалтын хөтөлбөрийн агуулгын тогтолцооны бүрэлдэхүүн хэсэг, суралцахуйн
зорилт, дидактик нэгжийн хүрээнд сурагчийн эзэмших мэдлэг, чадвар, анги хоорондын агуулгын
залгамж холбоо болоод өргөсөл, гүнзгийрэл харагдахуйц, тодорхой байх зарчмуудыг баримтлан
дараах үнэлгээний нэгжүүдэд хуваасан болно.
Нэгж хичээлийн үнэлгээнд хэрэглэх
Тухайн ангийн агуулгын нэгж хичээлийг үнэлгээний нэгжийн суралцахуйн үр дүнгүүдэд суурилан
төлөвлөх боломжтой. Ингэж төлөвлөсөн тохиолдолд багш нар тухайн нэгжийн суралцахуйн үр
дүнгийн үнэлгээний шалгууруудыг шууд хэрэглэн сурагчдын гүйцэтгэлийн түвшнийг тогтоох юм.
Өөрөөр хэлбэл, үнэлгээний шалгуурыг хэрэглэн нэгж хичээлийн явцын үнэлгээг хийх нь үнэлгээг
харьцангуй бодитой хийхэд дэмжлэг болно.
Багш тухайн нэгж хичээлээр явцын үнэлгээ хийхдээ нэгж хичээлийн суралцахуйн үр дүн, үнэлгээний
шалгуурт нийцсэн даалгавар, сурагчийн ажлын хуудас боловсруулан сурагч нэг бүрийн танин
мэдэхүйн болон гүйцэтгэлийн түвшнийг тогтооно.

10