Page 14 - Дизайн зураг зүй, технологи

ХИЧЭЭЛ, СУРГАЛТЫН ҮР ДҮНГ ҮНЭЛЭХ ШАЛГУУРЫГ ХЭРЭГЛЭХ ЗӨВЛӨМЖ

Явцын үнэлгээ. Багш ээлжит хичээл бүрээр суралцагчдын мэдлэг, чадвар хэрхэн эзэмшиж байгааг
ажиглах, хянах зорилгоор явцын үнэлгээний хэлбэрээс тухайн хичээлд тохиромжтойг нь сонгон
хэрэглэнэ. Явцын үнэлгээний нэг чухал хэсэг нь сурагчийг дан ганц багш үнэлэх биш, суралцагч
өөрийгөө болон бусдыг үнэлэх асуудал юм. Багш, сурагчдыг өөрийгөө болон бусдыг үнэлэх төрөл
бүрийн арга барилд сургах хэрэгтэй. Сурагч өөрийгөө болон бусдыг үнэлэхдээ суралцахуйн
зорилго, зорилт, үнэлгээний шалгуураа ойлгож мэдэх ба өөрийн үйл ажиллагаанд шинжилгээ хийх
чадвар эзэмшдэг.
Явцын үнэлгээний үр дүнд суралцагч “Би юуг мэдэж, чадаж байна вэ?, цаашид юуг бие дааж эсвэл
багшийн тусламжтайгаар сурах ёстой вэ? Илүү сайн суралцах, амжилтаа ахиулахын тулд юуг анхаарах
хэрэгтэй вэ?” гэдгээ ойлгож, мэддэг.
Өөрийн үнэлгээний жишээ:
Үнэлгээний шалгуур.ДЗЗТ11.2.1ҮД5.Ш1.Монгол дээлний суурь үлгэрийг загварчилгааны аргуудаар
өөрчилж загварчилдаг.
II түвшин. Монгол дээлний бүрдэл хэсгийг өөрчилж загварчилдаг.

Хүснэгт 2. Сурагчийн өөрийн үнэлгээний жишээ

БИ... Сайн Дунд зэрэг Итгэлгүй
Монгол дээлний захны эсгүүрийг
тойруу захтай болгож өөрчилж чадна.

Монгол дээлний хормойг нугалаатай
дэрэвгэр загвартай болгож өөрчилж
чадна.
Монгол дээлний ханцуйг залгаатай
болгож өөрчилж чадна.
Багш сурагчдын өөрийн үнэлгээний үр дүнд анализ хийж, ямар шалгуур, гүйцэтгэлийн түвшинд
хангалтгүй байгааг илрүүлж, цаашид анхаарч хичээлийн арга зүй, төлөвлөлтдөө тусгаж ажиллах
хэрэгтэй.

Үр дүнгийн үнэлгээ: Нэгж агуулга, бүлэг сэдвийн төгсгөлд үр дүнгийн үнэлгээ хийж болно.
Нэгж агуулгын хүрэх үр дүн, үнэлгээний шалгуурт тулгуурласан цогц даалгаврыг боловсруулж
сурагчдын мэдлэг, чадварыг үнэлж болно. Үр дүнгийн үнэлгээг хийхдээ үнэлгээний даалгаврыг
суралцахуйн үр дүнгийн шалгуурын дагуу үнэлгээний нарийвчилсан төлөвлөгөө /блюпринт/-нд
үндэслэн боловсруулна. Үүнийг 2 дугаар бүлэг “Нэгжийн үнэлгээний жишиг даалгавар” хэсгээс
харна уу.

10